Shaare Shalom Sinigag

Fram Wikipidia
Jump to navigation Jump to search

Kahal Kadosh Shaare Shalom "Uoli Kanggrigieshan a di Gietdem a Piis", aalso nuo az di Yunaitid Kanggrigieshan a Izrelait, a wah istarik sinigag ina di siti a Kinston pah di ailan a Jumieka. Tide, itan az di onggl Juuwish ous a woership ina di wuol konchri.

Ischri[change up | change up di source]

Wid di inflox a Juu tu Jumieka ina di 17t senchri, moltipl sinigag eh-kanschok kraas di ailan ina soch siti az Mantigo Bie, Panish Tong, Puot Rayal, ah Kinston. Arijinali, tuu sinigag eh-bil a Panish Tong, di Sefaadi K.K. Neve Shalom ("Abitieshan a Piis") kansikriet ina 1704, ah di hAshkenaazi K.K. Mikve Izrel ("Uop a Izrel") irek ina 1796. Demya tuu kanggrigieshan uda lieta moerj az di Juudem bigin fi maigriet frah Panish Tong tu Kinston, di nyuu kiapital siti.

Laka ina Panish Tong, tuu kangrigieshan (Sefaadi ah Ashkenaazi) weh-egzis ina Kinston. Inishal atemp fi faam a moerja neh soxesful. Di Yunaitid Kanggrigieshan a hIzrelait eh-kanschok di arijinal Shaare Shalom sinigag ina 1885, bot wah oertkwiek dischrayi. Di bildin eh-rikanschok bai di Enriikis Bredadem ina 1912. Dis chokcha stil tanop. Ina 1921, di hAshkenaazi komiuniti moerj wid di Shaare Shalom Sinigag fi faam wah yuunifai kanggrigieshan we kantiniu fi egzis.

Pah 23 Maach 2002, Nieshan a hIzlam liida Luuwis Farakan (Louis Farrakhan) vizit Shaare Shalom, ih fos visit tu wah sinigag, fi hatemp fi ripier ih kachovoershal rilieshanship wid di Juuwish komiuniti. Farakan eh-axep fi spiik a Shaare Shalom ina di nietiv konchri a ih faada, afta ih eh don-rijek fi hapier ina Moerkan sinigag, nof a uu eh-fried deh maita a-sen di rang signal tu di Juuwish komiuniti.

Tide[change up | change up di source]

Di sinigag kiah akamadiet muo dah 600 smadi fi soervis ina di sangchueri. Di sangchueri fluor kova ina san (frah di Sefaadi kostom) fi memba piipl bout di taim wen Juu eh-kova deh fluor wid san fi mofl di song a deh prayaz juurin di Panish Ingkuizishan. Di sangchueri aalso fiicha wah 52-stap paip aagan. Duo a weh wantaim wah Aatadax komiuniti, di Shaare Shalom sinigag nou lou mix siitin ah Libaral-Kansoervativ soervis we ingkaapariet prayaz ina buot Iibruu ah Ingglish.

Di kangrigieshan mentien di Ilel Akiadimi, wan a di tap prep skuul ina Jumieka. Di skuul ab tuotal inruolment a muo dah 800 schuudent ah imentien nan-dinaminieshanal stietos. Adishanali imentien wah myuuziom a Jumiekan Juuwish ischri ajiesent tu di sinigag. Az a kalekta a istarikal Judieka fran aal uoba di ailan, ikansida az wan a di fainis istarikal kalekshan ina di Kiaribiyan. Di madan Juuwish komiuniti ina Jumieka kansis a apraximetli 250–300 Juu.