Luwiiz Benit

Frahn Wikipidia
Jomp go a: navigieshan, saach
Luwiiz Benit

Posnal infamieshan

Baan: 7 Septemba 1919
Ded: 26 Julai 2006
Nashinaliti: Jumiekan

Profeshnal infamieshan

Profeshan: Puoyt, Fuokluoris, Raita ah Tiicha

Luwiiz Simuon Benit-Kuovali adawaiz nuo az Mis Luu OM, OJ, MBE (baan 7 Septemba 1919 ah ded 26 Julai 2006) wena wah Jumiekan puoyt, fuokluoris, raita ah tiicha. Shi weh-rait ah pofaam ar puoymdem ina Jumiekan Kryuol, so dat eh-elp fi gi di languij nof litareri rekanishan. Shi a wah senchral figa ina Jumiekan powetik tradishan ah wah chrang influens pah nof ada wel-nuon Kiaribiyan puoyt, laka Lintan Kwiesi Jansn ah Paal Kiinz Doglas.

Hoerli Laif ah Edikieshan[edit | edit suos]

Luwiiz Benit eh-baan 7 Septemba 1919 pah Naat Schriit ina Kinston, Jumieka. Shi ena di onggl pitni fi Agostos Kaaniilias Benit (Augustus Cornelius Bennett) uu eh-uon wah biekri ina Panish Tong, ah Keriin Rabinsn (Kerene Robinson), wah jresmeka. Afta ar faada ded ina 1926, Luwiiz mada a weh di mien wan we riez ar. Shi yuus fi go a Ebiniiza Elimenchri Skuul ah den Kalabaar Praimri skuul. Afta dat, shi atten Sin Saiman Kalij ah den Exelsia Kalij ina Kinston, bifuo shi inruol ina 1943 a Frenz Kalij a Aigiet, Sin Mieri Parish wishpaat shi stodi Jumiekan fuokluor. Ina 1945, Luwiiz Benit win wah awaad frah di British Kongsl fi stodi a di Rayal Akiadimi a Jramatik Aat, di fos Blak smadi fi stodi a datde skuul.

Profeshnal Laif[edit | edit suos]

Afta Luwiiz gradiet frah di Raayal Akademi a Jraamatik Aat, shi wok wid reprichri kompini aal uoba Ingglan, laka ina Kavenchri, Odazfiil ah Amasham.[1] Wen shi gubak a Jumieka shi staat fi tiich jraama tu buot pitni ah big piipl frah di suoshal welfier iejensi ah fi di Yunivoersiti a di Wes Indiz Exchra Myuural Dipaatment.

Mis Luu yuus fi tiich ah pofaam wid Kiaribiyan Kaanival frah 1945 tel 1946. Rong deh sieh taim de, shi eh-ab sebral liidn ruol ina pantomaim ah soh TV pruogram. Shi du nof trablin rong di wol a-promuot Jumiekan kolcha chuu ar lekcha ah pofaamansdem. Shi get wel-nuo a farin bot shi get speshal lov frah ar Jumiekan piipldem az wel frah piipl ina Kianada ah di Yunaitid Kindom. Ar puoymdem get poblish nof taim bot di muos nuotebl wandem a Jumieka Labrish (Jamaica Labrish) ah Anansi ah Mis Luu (Anancy and Miss Lou, 1979).

Nof piipl se ar muos influenshal rekaadn a weh ar rendishan a di tradishanal Jumiekan sang we niem "Die Da-lait" ("Day Dah Light") ina 1954. Ari Belafanti (Harry Belafonte) rekaadi ina 1955 tu az "Die-O" ("Day-O"), adawaiz kaal di "Banaana Buot Sang" wid soh adishanal lirix, bot stil bies pah Mis Luu voerjan. Mis Luu orijinal voerjan avielobl ina buot French ah Ingglish pah di Jumieka - Mento 1951-1958 (Jamaica - Mento 1951-1958) albom. Fi Belafanti voerjan eh wel fiemos duo. A wan a di biggis it rekaad ina 1950 ani giim ih fos guol rekaad.

Luwiiz Benit rekaad nof-nof sang laka: Jumiekan Singin Giemz (Jamaican Singing Games, 1953), Jumiekan Fuok Sang (Jamaican Folk Songs, Folkways Records, 1954), Chiljren Jumiekan Sang ah Giem (Children's Jamaican Songs and Games, 1957), Mis Luu Vyuu (Miss Lou's Views, 1967), Lisn tu Luwiiz (Listen to Louise, 1968), Kiarifesta Ring Ding (Carifesta Ring Ding, 1976), Di Anarebl Mis Luu, (The Honourable Miss Lou, 1981), Mis Luu Laiv-Landan (Miss Lou Live–London, 1983) ah Yes Mi Dier (Yes, M'Dear, Island Records).

Shi rait nof a ar puoymdem ina di languij a di piipl, Jumiekan Kryuol, ah elp meki get axeptans ah rekanishan az a languij, dierfuor elp fi influens nof ada puoyt laka Mutabaruka ah Juon Anjria Ochisn (Joan Andrea Hutchinson), fi du deh puoychri ina Jumiekan tu.

Ina 1986, shi apier ina wah kamedi flim niem Klob Paradais (Club Paradise) a-plie wah kiarakta niem Puosha. Di flim eh-staar Rabin Wiliamz (Robin Williams), Jimi Klif (Jimmy Cliff) ah Piita Otuul (Peter O'Toole).

Posnal laif[edit | edit suos]

Luwiiz Benit eh-marid tu Erik Winstan Kuovali (Eric Winston Coverley) pah 30 May 1954 ah shi eh-ab wan adaptid son niem Fiebian Kuovali (Fabian Coverley).

Det[edit | edit suos]

Mis Luu paasaan pah 27 Julai 2006 a di Skyaaboro Gries Aspital ina Skyaaboro, Antierio, Kianada (Scarborough, Ontario, Canada) wishpaat shi eh-lib fi di laas dekied a ar laif. Wan die shi jos kalaps a ar yaad. Deh weh-uol tuu saabis ina ar hana; wan memuorial saabis ina Taranto (Toronto) pah 3 Aagos 2006, ah afta dat deh flai ar badi gaa Jumieka fi lai-in-stiet a di Nashinal Ariina a Kinston pah 7 Aagos ah 8 Aagos. Deh uol wah finaral ina ar hana ina Kinston a di Kuok Metodis Choch pah Iis Paried pah 9 Aagos 2006. Den deh intoer ar badi ina di kolchral aikan sekshan ah Nashinal Iiroz Paak (National Heroes Park).[2]

Awaad ah Hanaz[edit | edit suos]

Ina 1960, deh mek Luwiiz Benit wah Memba a di Muos Exilent Aada a di British Empaya (Member of the Most Excellent Order of the British Empire, MBE) fi ar wok ina Jumiekan lichicha ah tieta.[3]

Ina 1974, di Jumiekan Govament apaint ar tu di Aada a Jumieka (Order of Jamaica). Deh weh azwel apaint ar az Kolchral Ambasada-at-Laaj fi Jumieka. Mis Luu get nof-nof awaad inkluudn di Instityuut a Jumieka Mosgriev Silva ah Guol Medal fi ar eminens ina di fiil ah Aats ah Kolcha, di Naaman Manli Awaad a Exilens (ina di fiil a Aats), wah Anareri Daktaret a Letaz frah di Yunivoersiti a di West Indiz (1983), ah wah Anareri Daktaret ah Letaz frah Yaak Yunivoersiti ina Taranto.

Ina 2001 pah Jumieka Indipendans Die, di Anarebl Mischris Luwiiz Benit-Kuovali weh get apaint az memba a di Jumiekan Aada a Merit fi ar invalyuebl ah distingguish kanchribyuushan tu di divelopment a di Aats ah Kolcha.

Ina hana a Mis Luu ah ar achiivmentdem, Harbourfront Centre, wah nan-prafit kolchral aaganizieshan ina Taranto, Kianada, weh niem wah venyuu aafa ar, nuo az Mis Luu Ruum.[4]

Kolchral Signifikans ah Legisi[edit | edit suos]

Luwiiz Benit puoym we niem Kalanaizieshan ina Rivoers (Colonization in Reverse, 1966) provaid wah istorikal kantex fi nof a di mainariti dem we lib ina di UK ina puos-koluonial taim. Ou shi eh-puochrie di Jumiekan expiiriens ah disluokieshan ah rieshal inikualiti komiin laka di expiiriens we Sout Iejan piipl uu weh lib a Landan eh-ab. Azwel, buot Jumiekan ah Sout Iejan piipl eh-ab simila expiiriens wen deh weh-muuv gaa Ingglan a-luk emplaiment ah beta laif, so buot piipl go chuu di komplexiti a asimilieshan ah dyual aidentiti.

Benit ailait fiar kansep a kolchral dislayalti wen shi rait bout Jumiekan piipl wen deh de pah kues fi get beta jab apachuniti: “Dem a pour out a Jamaica/ Everybody future plan/ Is to get a big-time job/ An settle in de mother lan.”[5] Ar refrans tu di “mother lan” yash a no Jumieka, bot Ingglan, bies pah ou Jumiekan piipl wena asimiliet ina Ingglan kolcha ah weh-siim fi figat bout di riil mada lan - Jumieka.

Deh weh-duoniet fuotograaf, aadiovijual rekaadn, karispandans, awaad ah nof ada matiiral we riliet tu Luwiiz Benit tu di Makmaasta Yunivoersiti Laibri (McMaster University Library) ina 2011 bies pah wah agriiment we se soh silekshan frah di fonz, we diet frah 1941 tu 2008, weh fi dijitaiz ah mek avielobl pahlain az paat a wah dijital aakaiv.[6]

Ina 2015, Moervin Maris (Mervyn Morris) poblish wah buk niem Mis Luu: Luuwiz Benit ah Jumiekan Kolcha (Miss Lou: Louise Bennett and Jamaican Culture).[7]

Refrans[edit | edit suos]

  1. "Biography of Dr. the Honourable Louise Bennett Coverley", Louise Bennett official website.
  2. "Miss Lou to be Buried on August 9." Jamaican Information Service: August 1, 2006. Nuoroda tikrinta 28 November 2015.
  3. Knolly Moses, "Louise Bennett, Jamaican Folklorist, Dies at 86", The new York Times, 29 July 2006.
  4. "Miss Lou's Room."
  5. Bennett, Louise. “Colonization in Reverse”. 1966
  6. A treasure trove from Miss Lou, Hamilton Spectator. Feb 14, 2011. Abgerufen am 28 November 2015. 
  7. Walters, Basil (2015), "Prof Morris launches ‘Miss Lou’ book", Jamaica Observer, 12 February 2015. Retrieved 15 February 2015.

Extoernal Lingk[edit | edit suos]