Kojo

Kojo

Posnal infamieshan

Baan: 1680
Ded: 1744
Nashinaliti: Jumiekan

Profeshnal infamieshan

Profeshan: Maruun Liida, Militeri Liida
Muuvment: Sliev Rivuolt, Abalishanis

Kojo (baan rong 1680 ah ded rong 1744) wena wah Maruun liida ina Jumieka. Ih eh-lib rong di sieh taim az Nani a di Maruun. Som piipl se outa aal a di Maruun liidadem we eh-lib im a di tapatap Maruun liida.

Fambli

Di Maruun piipldem se Kojo a-weh Nakuan (Naquan) bwai pikni we a eh wah liida ina Asanteman, di lan we di Ashanti-Akan piipldem lib ina, wa deh kaal Gaana (Ghana) nowadiez. Deh kiapcha Nakuan ah ton im ina wah sliev a Jumieka ina di 1640z bot ih ribel gens di Panish piipldem ah ronwe wid ih klan ina di mountndem we de ina di migl a Jumieka. An a so ih mek di fos Maruun komiuniti. Deh niem Maruun chuu di Panish wod fi 'lego biis' a cimarron.

R. C. Dalas (Dallas), ina ih Maruun ischri buk, kliem se Kojo faada a-weh wah liida fi di 1690 ribelian we eh-gwaan pah Koernel Sotn (Sutton) plantieshan ina Klarindan parish.

Chiif a di Liiwad Maruun

Ina di 1700z di govament eh-disaid se dem ena-go get rid a di Maruundem ah staat sen suoja ina di bush fi fain dem an deh staat fi kil aaf som a di likl Maruun gruupdem. Di rekaaddem no riili se a wa mek deh du dat. Wi nuo se di Maruundem neva tuu bada-bada di wait piipldem; duo sohtaim siek a onggri beli dem eh-rosh di plantieshan ah tiif piipl kou. Bot frah di Panish piipldem eh-lef Jumieka, di Panish Maruundem ah di Inglish piipldem eh fait noftaim. Edwad Lang (Edward Long) se di Panish piipldem eh-tel di Maruundem se di Inglish piipl a moerdara ah rebl gens di choch. Aafa dat di Panish Maruundem yuus fi kom-koh atak di suojadem ah aal bondong wah hous. Ina 1656, Jinaral Sejwik (Sedgewick) eh-rait wah leta we se 'di blak piipldem (Maruun) a-go ton wah maka we de-juk wi ina wi said.' Edwad Lang kliem se ina 1693 Kojo dem staat fi waar gens di govament 'ina di uopm', bot dis no raitdong ina aal a di rekaad.

Askaadn tu di Maruundem wen Kojo faada eh-dedaaf, im eh ton di liida. Wan nex rekaad kliem se di Liiwad Maruundem ina Klarindan (Clarendon) neh ab no chiif, bot dem eh-ab difrah-difrah liida. Bot wen di Liiwad Maruun fain out se di govament eh wel waah get rid a dem, dem pik Kojo fi bi deh tapatap liida we niem chiif. Den Kojo ton him bredadem, Akompong (Accompong) ah Jani (Johnny), ina liida anda im ah ton ih ada bredadem, Kofi (Cuffee) ah Kwao (Quao) ina kiaptin. Deh staat fi waar gens di govament suojadem regila ah komop wid wah wie fi fait di govament suojadem. An a deh taim de piipl staat fi kaal Kojo gruup Maruun. Kaa bifuo deh taim de, a onggl di Winwad Maruundem ina di Bluu Mountndem eh kaal Maruun.

Wen di Kata'ud (Cottawood) Maruundem ier se wah big gruup a Klarindan Maruun ena-fait di wait piipldem, deh lef di Iis go jain dem ina Klarindan. Rong deh taim de wah nex set a Maruun we deh kaal di Madagiaska dem eh-jainop wid Kojo ah di Liiwad Maruundem. Di Madagiaskadem eh-ronwe frah Lakuovia ina Sint Ilizibet. Iida muos a dem ar onggl fi deh liida eh-kom frah di konchri Madagiaska. A dat mek piipl kaal dem di Madagiaskadem.