Tämä on suositeltu artikkeli

Joan of Arc

Frahn Wikipidia
Jump to navigation Jump to search

Saint Joan of Arc

Joan of Arc a wahn nashinal erowin a Frans an wan Kyaklik sient. Shi baan puor ina iistan Frans, an shi liid di French aami pan nof impuotant vikchri juurin di onjrid ier waar. Shi kliem se se wehn av divain gaidans, an wehn indirekli rispansibl fi di koronieshan a Charles VII. Shi get kyapcha bai di Burgundians, get sel tu di Ingglish, get chrai ina kuot, an dem bon ar pan di stiek wen shi a jos 19 ier uol. Twenti fuo ier afta dat Puop Callixtus III rivyuu di disijan a di ikliiziastik kuot, fain ar inosent, an diklier ar wan maata. Shi get biatifai ina 1909 an den kyanonaiz ina 1920. Tide, shi a wan a chrii piechran siet ina Frans. Joan kliem se shi get vijan fram Gad we tel ar se shi fi tek ar uomlan fram Ingglish daminieshan iet ina di Onjrid Ier Waar. King Charles VII sen art u di siij a Orliinz az paat a di riliif mishan. Shi get big-op wen shi uovakom di kantenshos atityuud a di komaanda dem, an lif op di siij ina jos nain die. Nof ada swif vikchri liid Charles VII fi get kroun an sekl di dispyuut bout sokseshan tu di chuon. Joan of Arc a stil wan impuotant figa ina Westan kolcha. Fram Napoleon tu di prezent, French palitishan fram aal bout taak bout ar. Nof mieja raita mek tingz bout ar, laik Shakespeare (Henry VI), Voltaire (La Pucelle d’Orleans), Schiller (Die Jungfrau von Orleans), Verdi (Iovanna d’Arco), Tchaikovsky, Mark Twain (Persnal Rekalekshan a Joan of Arc), Jean Anouilh (L’Alouette), Bertolt Brecht (Die Heilige Johanna der Schlachthofe), George Bernard Shaw (Saint Joan), an Maxwell Anderson (Joan of Lorraine). Nof dipikshan a ar stil de ina flim, tv, vidyo giem, sang, an dans.