Tämä on suositeltu artikkeli

Ischri a di Migl Iis

Frahn Wikipidia
Jump to navigation Jump to search

Di Migl Iis a wahn riijan we chrech frahn soutwes Ieja, soutiis Yuurop an naatiis Afrika. Di riijan naav no klier klier bounjri. Di Migl Iis a di bortplies an spirichwal senta fi Juudaizm, Kristianiti, Izlam, Yezidi, an ina Iran, Michra'izm, Zuoroaschrianizm, Manika'izm, an di Ba'ai Fiet. Chuu di ischri a di riijan di Migl Iis a wahn mieja senta fi wol afier. Palitikali, Ikanamikali, kochrali, an rilijosli, di riijan a wahn sensitiv ieria. Di orlies siblaizieshan dem, Mesopotiemia an ienchent Iijip, divelop ina di Fortail Kresent an Nail Vali riijan a di ienchent Nier Iis, an tu di siblaizieshan a di Levant, Iran, an Ariebian Peninsula. Di nier iis get yuunifai fos aanda di Achaemenid Empaiya; den bai di Maseduonian Empaiya; an den di Partian an Sasanid Empaiya dem. Di Arab Kalifet dem ina di Migl Iej, ar di Izlamik Guolen Iej, wehna di fos fi yuunait di wuola di riijan az wahn sepret riijan, and mek di daminant etnik aidentiti an langwij we wi si tide. Di Seljuk, Ataman, an di Safavid empaiya dem daminiet di riijan afta.

Di madorn Migl Iis kom bout afta Wol Waar 1, wen di Ataman empaiya, an di Senchral Powa dem uu luuz di waar, paat op di riijan ina sepret nieshan nieshan. Ada tingz we gwaan ina disa chrasfamieshan ya inkluud di establishment a Izrel ina 1948, an di dipaacha a di Yuuropiian powa dem, Griet Britn an Frans we wehn av palitikal influens ina di riijan. Ina som wie, di Yunaitid Stiets tek dem plies.

Ina di 20t senchri, wuoliip a kruud ail fain ina di riijan, an disya gi di Migl Iis muo impuotant ina di wol. Mas prodokshan a di ail taat roun 1945, wid Saadi Ariebia, Iran, Kuwiet, Irak, an di Yunaitid Arab Emiriets, uu wehn av di muos ail. Estimet fi di mount a ail rizorv, espeshali ina Saadi Ariebia an Iran, a som a di aiyis ina di wol. Di intanashinal ail kaatel OPEK av muosli Migl Iistan konchri.

Ina di Kuol Waar, di Migl Iis wehna wan plies we yu kuda obzorv aidialajikal an palitikal schrogl bitwiin di tuu suupapowa dem: di Yunaitid Stiets an di Suoviet Yuunian, az dem wehna fait fi influens di difrent konchri dem ina di riijan. Ina di 20t senchri, an ina di 21s senchri, di riijan expiiriens piiriad a piis an talarans, an piiriad a kanflik an waar. Di korent ishyu dem nowadiez a di Irak Waar, Izrel-Plalistain kanflik, an di Irienian Nyuuklier Pruogram.