Muhammad

Demya piej ya a fi wah nesiseri aatikl.
Fram Wikipidia

Muhammad a di founda a di Izlam rilijan, bot a di siem taim, Mozlim piipl kansida im wan mesinja an prafit a Gad, di laas an di grietis laa-biera ina wan siiriiz a Izlamik prafit we di Koran tiich bout. Mozlim piipl kansida im di ristuora a di kliin arijinal monotiistik fiet a Adam, Noah, Abraham, Moses, Jesus an som ada prafit. Im a wehn wan aktiv diplomat, morchant, filasifa, orieta, lejislieta, rifaama, milichri jenaral, an askaadn tu Mozlim biliif, wan iejent a divain akshan. Muhammad baan ina 570 KI (Kaman Iira) ina Meka (Madorn die Saadi Ariebia), an ton aafan wen im yong; im onggkl Abu Talib gruo im. Wen im gruo big im wok az wan morchant, an wan shepad, an mari im fos uman bai di taim im ton 25. Im neva laik im laif ina Meka, an so im go liv ina whn kiev op ina di moutn dem we de roun di siti fi go uol a medz an riflek. Askaadn tu Izlam a yaso, wen im a 40, ina di mont a Ramadan im get di fos revilieshan fram Gad. Chrii ier afta dis, Muhammad stat prrich di revilieshan dem ina poblik, a se “Gad a wan” an se tuotal “sorenda” tu im a di onggl wie fi Gad aksep smadi, an se im a prafit an mesinja a Gad uoli wod, ina di siem wie az som ada prafit ina Izlam. Ina di orli paat Muhammad wehn onggl av fyuu falara, an som chraib ina Meka chriit im bad. Fi eskiep porsikyuushan im am in falara dem maigriet tu Mediina (we dem wehn kaal Tayhrib) ina di ier 622 KI). Da muuvment ya, di Ijra, maak di staat a di kalenda ina Izlam. Wen im de ina Mediina im yuunait di waari-waari chraib dem an afta iet ier a faitin wid di Mekan chraib dem, im falara dem, uu wehn nomba 10,000 bai dem taim de, kangka Meka. Ina 632 KI, jos fyuu mont afta im gu bak a Mediina, Muhammad get sik an ded. Bai di taim wen im ded, di entaia Ariebian peninsula don kanvort tu Izlam; an im yuunait di difrent-difrent chraib dem aanda wan rilijan. Di rilijan bies pan di revilieshan (ar Ayat, lit. “Sain a Gad”), dem we Muhammad kliem se im get fram Gad. Tide, Mozlim piipl memba di laif (sira) an chradishan (sunnah) a di prafit. Dem taak bout Muhammad an di ada prafit dem wid revrens, an ad di friez “piis bi pan dem” wen dem menshan dem niem.