Abaiyojenisis

Demya piej ya a fi wah nesiseri aatikl.
Fram Wikipidia

Ina di nachral saiyans dem, abaiyojenisis, ar di arijin a laif, a di stodi a ou laif pan di ort kuda eva divelop outa non-livin mata. Ano di siem ting az evaluushan, faa dat a di stodi a ou difrent gruup a livin tingz chienj uova taim. Amiino asid, binuon az di "bildin blak fi laif", okor ina niecha, chuu kemikal riakshan we no rilietid to laif. Ina evri livin ting, amiino asid aaganaiz ina pruotiin; di kanschrokshan a dem ya pruotiin kom bout chuu di akshan a nyuukliik asid. Dat go fi miin se di kwestyan bout ou laif pan di ort kom bout afi du wid ou di fos nyuukliik asid kom bout.

Saiyantis don figa out som tingz bout di arijin a laif, bot som ada wan a stil di sobjek a korent risaach. Di fos livin ting dem pan di ort a wehn prabli singgl sel pruokariyuot. Di oules fasl maikruob-laik objek dem diet bak tu 3.5 Ga (bilian ier uol), jos a fyuu onjrid milian ier yongga dan di ort. Bai 2.4 Ga, di riesho a stiebl aisotup fi kaaban, aiyan, ahn solfa shuo di akshan a livin tingz pahn inaagyanik minaral ahn sediment ahn di molekyula baiyomaaka dem indikiet fuotosintesis, we shuo se laif pahn ort wehn kaman bai da taim ya.

Pan di neda an, di egzak aada a di kemikal iven tdem we liid tu di fos nyuukliik asid stil a wahn mischri. Nof difrent aipatisis bout orli laif mek op aredi; di muos kaman wan dem a di aiyan-solfa worl tiyori (metabolizm widout jinetiks) ahn di RNA worl aipatisis (RNA laif faam)