Ruoman Ripoblik

Frahn Wikipidia
Jomp go a: navigieshan, saach

Di Ruoman Ripoblik (Latn: Res publica Romana; Klasikal Latn: [ˈreːs ˈpuːb.lɪ.ka roːˈmaː.na]) wena di piiriad a ienshent Ruoman siblizieshan bignin wid di uobachuo a di Ruoman Kindom, chadishanali diet tu 509 BKI, ah hen ina 27 BKI wid di extablishment a di Ruoman Empaya. A weh juurin dis piiriad wen Ruom kanchuol eh-expan frah di siti imidiet sorounin tu egemani uoba di wuola di Meditarienian wol. Juurin di fos tuu senchri a iegzistans, di Ruoman Ripoblik expan chuu a kombinieshan a kangkues ah alayans, frah senchral Itali tu di wuola di Italian peninsiula. Bai di falarin senchri, iweh-ingkluud Naat Afrika, Spien, ah waa nou sodan Frans. Tuu senchri afta dat, tuwadz di hen a di 1s senchri BKI, iweh-ingkluud di res a madan Frans, Griis, ah nof a di iistan Meditarienian. Bai dis taim, intoernal tenshan eh-liid tu wah siiriz a sivl waar, we kolminiet wid di asasinieshan a Juulios Siiza, we eh-liid tu di chanzishan frah ripoblik tu empaya. Di egzak diet a chanzishan kiah bi a mata a intopritieshan. Istuoriandem eh vieriosli propuoz Juulios Siiza kraasin a di Ruubikan Riva ina 49 BKI, Siiza apaintment az diktieta fi laif ina 44 BKI, ah di difiit a Maak Antuoni ah Kliopachra a di Bakl a Aktiom ina 31 BKI. Ousomeba, muos a dem yuuz di siem diet we di ienshent Ruoman dehself eh-yuuz, wen di Ruoman Senit grant exchraadineri powa tu Aktievian ah wen ih adap di taikl Agostos ina 27 BKI, az di difainin ivent we hen di Ripoblik.