Tämä on suositeltu artikkeli

Griet Dipreshan

Frahn Wikipidia
Jomp go a: navigieshan, saach

Lange-MigrantMother02.jpg

Di Griet Dipreshan wehna sivier wolwaid ikanamik dipreshan ina di dikied wa prisiid Wol Waar II. Di taimin a di Griet Dipreshan vieri kraas di nieshandem, bot ina muos konchri itaat ina bout 1929 ahn laas tel di liet 1930s ar hoerli 1940s. Iwehna di langis, muos waidpred, ahn diipis dipreshan a di 20t senchri. Ina di 21s senchri, di Griet Dipreshan kamanli yuuz az exampl fi ou for di wol ikanami kiahn diklain. Di dipreshan arijiniet ina di Yunaitid Stiet, wen stak prais taat fi jrap roun Septemba 4t 1929 ahn ibikomz wolwaid nyuuz wid di stak maakit krash pahn Aktuoba 29, 1929 (nuo az Blak Chuuzde). Frahn de so, ipred kwik-kwik tu muosli ebri konchri ina di wol.

Di Griet Dipreshan ab divastietin ifek ina voerchuali ebri konchri, rich ahn puo. Poersnal inkom, tax rivinyuu, prafit ahn prais jrap, wails intanashinal chried plonj bai muo ahn 50%. Anemplaiment ina di Y.S. riez tu 25%, ahn ina som konchri riez az ai az 33%. Siti aal roun di wol get lik bad, speshal demde dipend pahn ebi indoschri. Kanschrokshan voerchuali shet dong ina nof konchri. Faamin ahn ruural ieriadem sofa az di krapdem prais jrap bai apraximekli 60%. Wid plometin dimaan ahn fyuu altanet suos fi jab, ieria wa dipen pahn praimri sekta indoschri laka kiash krap, mainin ahn lagin sofa di muos.

Som ikanami taat fi rikova bai di mid-1930s. Ousomeba, ina nof konchri di negitiv ifek a di Griet Dipreshan laas klier tel Wol Waar II taat.